Listen to Ahirani’s Danka, Singer Artist Pravin Mali’s funny reaction in ‘Marathi Paol Padte Udaya’
‘मराठी पाऊल पडते पुढे’मध्ये अहिरानीचा डंका, गायक कलावंत प्रविण माळी यांची मजेदार प्रतिक्रिया ऐका
Dhule News धुळे : मराठीसोबतच अहिरानी गाणी आणि संवाद असलेला ‘मराठी पाऊल पडते पुढे’ हा चित्रपट पाच मे रोजी मोठ्या पडद्यावर प्रदर्शित होत आहे. चित्रपटाची संपूर्ण टीम एका कार्यक्रमानिमित्त रविवारी धुळ्यात होती. राजर्षी छत्रपती शाहू महाराज नाट्य मंदिरात झालेल्या पत्रकार परिषदेत निर्माता प्रकाश बाविस्कर यांच्यासह कलावंतांनी चित्रपट पहाण्याचे आवाहन धुळेकरांना केले.
छत्रपती शाहू महाराज नाट्यमंदिर धुळे येथे चित्रपटाच्या संदर्भात पत्रकार परिषद झाली. निर्माते प्रकाश बाविस्कर, चित्रपटाचा मुख्य अभिनेता चिराग पाटील व मुख्य अभिनेत्री सिद्धी पाटणे, अहिरानी कलावंत प्रविण माळी, विजया मानमोडे, कवी जगदिश देवपूरकर, शिवसेनेचे महानगर प्रमुख डॉ. सुशिल महाजन उपस्थित होते.
मराठी मालिका विश्‍वातून बॉलीवूडपटात झळकलेला आणि स्टार क्रिकेटपटू संदीप पाटील यांचा चिरंजीव अभिनेता चिराग पाटील आणि ‘गोव्याच्या किनाऱ्यावर…’ रुपेरी वाळूत सोनेरी लाटांवर स्वार झालेली अभिनेत्री सिद्धी पाटणे यांच्या लव्हस्टोरीने सजलेला ‘मराठी पाऊल पडते पुढे’ हा सिनेमा ५ मे रोजी संपूर्ण महाराष्ट्रभर प्रदर्शित होणार आहे. या चित्रपटाच्या निमित्ताने चिराग आणि सिद्धी हे प्रथमच एकत्र आले आहेत. मराठी चित्रपटसृष्टीला हवा असलेला आणि सिनेमाच्या कथानकाला साजेसा असा उंच शरिरयष्टी आणि देखणा नायक चिरागच्या रुपाने मिळाला आहे. म्युझिक अल्बमच्या माध्यमातून घराघरात पोहोचलेली सौंदर्यवती सिद्धी पाटणेची रोमँटीक साथ चिरागला लाभली आहे. रीयल लाईफमध्ये स्टाईल आयकॉन असणाऱ्या ह्या दोन्ही कलाकारांची ‘मराठी पाऊल पडते पुढे’ ह्या सिनेमातील केमिस्ट्री मोठ्या पडद्यावर पाहाणं औत्सुक्याचे ठरेल.
नुकताच या चित्रपटाचा संगीत प्रकाशन सोहळा ज्येष्ठ विधीज्ज्ञ पद्मश्री उज्ज्वल निकम यांच्या हस्ते १३ एप्रिल रोजी दादर येथे करण्यात आला. ‘मराठी पाऊल पडते पुढे, ह्या चित्रपटाचा ट्रेलर पाहून हा चित्रपट मराठी तरुणांना संघर्ष करण्याची प्रेरणा देणारा आहे, याची मला खात्री झाली.आयष्य हे बागडण्याचे क्रीडांगण नसून प्रतिकुल परिस्थितीत झुंज देण्याचं रणांगण आहे, हा संदेश या चित्रपटाच्या माध्यमातून लोकांपर्यंत पोहोचेल. निर्माते प्रकाश बावीस्कर हे माझ्या जिल्ह्यातील आहेतच पण माझे चांगले मित्रही आहेत, मी त्यांच्या पाठीशी ठामपणे उभा आहे, असे गौरवोद्गार विशेष सरकारी वकील पद्मश्री उज्ज्वल् निकम यांनी चित्रपटाच्या संगीत प्रकाशन सोहळ्यानिमित्त काढले.
मराठी माणूस हा केवळ नोकरीत रमणारा नाही तर व्यवसायात उतरून नोकऱ्या देणारा होऊ शकतो, असे वातावरण हा चित्रपट निर्माण करेल, अशी आशा आहे. मराठी बांधकाम व्यावसायिक महासंघ हा निर्माता प्रकाश बाविस्कर आणि चित्रपटाच्या संपूर्ण टीमच्या सोबत आहे, अशी ग्वाही सुरेश हावरे यांनी या प्रसंगी दिली.
मराठी पाऊल पडते पुढे हे शीर्षक वाचून चित्रपट पाहण्याची उत्सुकता अधिक वाढते. असामान्य कर्तृत्व गाजवलेल्या अनेक मराठी दिग्गजांनी जगाच्या नकाशावर आपली पताका डौलाने फडकवली. पण, तरीही एकूण मराठी भाषिकांमध्ये व्यावसायिकता, उद्यमशीलता आणि व्यापक दृष्टीकोन ठेवून कार्य करण्याची वृत्ती नसते, असा एक ढोबळ समज आहे. अर्थात, त्याला अनेक कारणे असू शकतात. स्वप्न सत्यात उतरविण्यासाठी संघर्ष हा अटळ आहे, आणि तो करण्यासाठी आजचा मराठी तरूण कुठेही कमी नाही. फक्त पाठीवर हात ठेवून लढ म्हणणाऱ्यांची गरज आहे. ही गरज, प्रेरणा आणि ऊर्जा प्रभावी मनोरंजनाद्‌वारे देण्यासाठी तसेच समस्त मराठी मन आणि मनगटे मजबूत करण्यासाठी निर्माता प्रकाश बाविस्कर यांची निर्मिती व शिवलाईन फिल्म्सची प्रस्तुती असलेला “मराठी पाऊल पडते पुढे’ हा चित्रपट ५ मेपासून संपूर्ण महाराष्ट्रात प्रदर्शनासाठी सज्ज झाला आहे.
मराठी तरुणांना व्यसायाकडे वाटचाल करण्याकरीता प्रोत्साहन देणारा आणि संघर्षातून यश कसे प्राप्त करता येते याचे मार्गदर्शन करणारा हा चित्रपट आहे. निर्माते प्रकाश बाविस्कर हे सुध्दा एक व्यवसायिक आहेत. लेखक-दिग्दर्शक स्वप्निल मयेकर यांनी लिहिलेल्या कथेमध्ये व्यवसायाऐवजी मराठी माणूस नोकरीला जास्त महत्व देतो. पण, काही मोजक्या व्यक्तीच व्यवसायाकडे वळतात. मात्र नायकाला इतर प्रस्थापित व्यावसायिकांकडून त्रास होतो. प्रस्थापित व्यावसायिक राजकीय मंडळी व अधिकारी यांच्याशी अभद्र युती करुन येनकेन प्रकारे उभरत्या व्यावसायिकांना त्रास देतात. त्याविरोधात नायक करीत असलेला संघर्ष, त्याची व्यावसायिक मानसिकता, सचोटी व अडचणीतून मार्ग काढण्याचा रोख कसा असावा? हे चित्रपटाच्या माध्यमातून मांडले आहे.
चित्रपटाच्या मांध्यमातून येणाऱ्या निव्वळ नफ्यातील दहा टक्के रक्‍कम कलाकारांना आणि उर्वरीत भाग हा मराठी तरुणांना व्यवसाय मार्गदर्शनासाठी, आत्महत्याग्रस्त शेतक-यांच्या मुलांसाठी आणि वृध्दाश्रमासाठी देऊ केला आहे, म्हणून हा चित्रपट प्रत्येकाला पाहावाच लागेल. त्याचबरोबर चित्रपटाचे लकी ड्रॉ तिकीट मिळविण्यासाठी ८९५५४४११३३ या क्रमांकावर मिस कॉल देण्याचे आवाहन निर्माता प्रकाश बाविस्कर यांनी केले आहे.
अकात फिल्म्सचे चंद्रकांत विसपुते हे ह्या चित्रपटाचे सहनिर्माते आहेत. संगीत दिग्दर्शक समीर खोले यांनी सिनेमाची सर्व गाणी संगीतबद्ध केली आहेत. स्वप्नील मयेकर लिखित-दिग्दर्शित तसेच चिराग पाटील, सिद्धी पाटणे, जेष्ठ अभिनेते अनंत जोग, सतीश पुळेकर, सतीश सल्लागरे, संजय क्षेमकल्याणी आणि प्रदीप कोथमिरे यांच्या प्रमुख भूमिका असलेला हा चित्रपट मनोरंजनाबरोबरच मराठी तरुणांच्या स्वप्नांना बळ देणारा आणि भविष्याप्रती जागरुक करणारा ठरेल, असे निर्माते प्रकाश बाविस्कर म्हणाले.
