Threat to Congress president Mallikarjun Kharge, demand to file a case against Karnataka BJP candidate
काँग्रेस अध्यक्ष मल्लिकार्जुन खर्गे यांना धमकी, कर्नाटकच्या भाजप उमेदवारावर गुन्हा दाखल करण्याची मागणी
Dhule News धुळे : काँग्रेस पक्षाचे राष्ट्रीय अध्यक्ष मल्लिकार्जुन खर्गे व त्यांच्या परिवाराला जीवे ठार मारण्याची धमकी देणार्‍या कर्नाटक चित्तपूर विधानसभा भाजपाचे उमदेवार मनीकांत राठोड यांच्यावर गुन्हा दाखल करण्याची मागणी धुळे शहर जिल्हा काँग्रेस पक्षाच्या वतीने करण्यात आली. जिल्हा पोलिस अधिक्षकांना शहर जिल्हाध्यक्ष डॉ.अनिल भामरे यांनी याबाबत निवेदन दिले.
अखिल भारतीय काँग्रेस पक्षाचे राष्ट्रीय अध्यक्ष मल्लिकार्जुन खर्गे आणि त्यांच्या परिवाराला कर्नाटक भाजपाचे विधानसभा उमेदवार मनीकांत राठोड यांनी धमकी दिली आहे. मनीकांत राठोड हे गुन्हेगारी पार्श्‍वभूमीचे व्यक्ती असून त्यांच्यावर कर्नाटकात अनेक प्रकारचे गंभीर गुन्हे दाखल आहेत. राष्ट्रीय अध्यक्ष मल्लिकार्जुन खर्गे यांना धमकी दिल्याने खर्गे व त्यांच्या परिवाराच्या जीवितास धोका निर्माण झाला आहे. त्यामुळे राठोड यांच्यावर तत्काळ गुन्हा दाखल करण्याची मागणी धुळे शहर जिल्हा काँग्रेसच्या वतीने धुळे जिल्हा पोलिस अधीक्षकांकडे एका निवेदनाव्दारे करण्यात आली आहे.
याबाबत शहर काँग्रेसचे जिल्हाध्यक्ष डॉ.अनिल भामरे, महिला काँग्रेस अध्यक्षा गायत्री जयस्वाल, सेवा दलाचे अध्यक्ष अलोक रघुवंशी, शहर काँग्रेस उपाध्यक्ष प्रा.जसपाल सिसोदिया यांनी पोलिस अधिक्षकांची भेट घेतली.
