pradhanmantri kisan urja suraksha evam utthan mahaabhiyan
शेतकऱ्यांसाठी खुशखबर, तीन लाख ७४ हजारांचा सौर कृषी पंप फक्त ३७ हजार ४४० रुपयांना
धुळे : कृषी पंपांचे वीजबिल म्हणजे शेतकऱ्यांसाठी डोकेदुखी ठरली आहे. वीजबिल थकल्याने अनेकांचे वीज कनेक्शन बंद केले आहे. तसेच वारंवार खंडित होणाऱ्या वीज पुरवठ्यामुळे पिकांना वेळेवर पाणी देणे शक्य होत नाही. रात्री-अपरात्री बारा धरायला जावे लागते.
परंतु आता शेतकऱ्यांसाठी एक आनंदाची बातमी आहे. पीएम-कुसुम योजनेचा लाभ घेतला तर वीजबिलापासून मुक्तता होऊ शकते. तसेच लाईट गेली तरी चिंता नाही. त्यासाठी तुम्हाला विहिरीजवळ सोलर पॅनल बसवावे लागेल. म्हणजे तुमच्या कृषीपंपाचे विद्युतीकरण सौर ऊर्जेवर करावे लागेल. विशेष म्हणजे हे सोलर पॅनल विकत घेताना तुम्हाला केवळ दहा टक्के रक्कम द्यावयाची आहे. ९० टक्के रक्कम माफ म्हणजे शासनाचे अनुदान आहे.
सोप्या शब्दात सांगायचे झाले तर पाऊणे चार लाखाचे सोलर पॅनल फक्त ३७ हजार ४४० रुपयाला मिळणार आहे. आणि तुम्ही जर एससी किंवा एसटी कॅटेगरीचे असाल तर ते तुम्हाला केवळ १८ हजार ७२० रुपयाला मिळणार आहे. योजना फायद्याची आहे. ऑनलाईन अर्ज करून मोकळे व्हा…!
राज्य शासनाने अपारंपरिक ऊर्जा स्त्रोतांचा विकास घडवून आणण्यासाठी वेळोवेळी प्रोत्साहनात्मक धोरणे जाहीर केली आहेत. त्यानुसार शेतकऱ्यांच्या कृषीपंप वीज जोडण्यांचे विद्युतीकरण सौर ऊर्जेद्वारे करण्यासाठी राज्य शासन गेल्या काही वर्षांपासून स्वयं अर्थसहाय्यित तसेच केंद्र शासनाच्या अर्थसहाय्यातून विविध योजना राबवत आहे. त्याअंतर्गत केंद्र शासनाकडून देशभरात राबविण्यात येत असलेल्या प्रधानमंत्री किसान ऊर्जा सुरक्षा एवंम उत्थान महाभियानाला (पीएम-कुसुम) राज्यात गती देण्याचा निर्णय महाराष्ट्र शासनाने घेतला आहे.
MNRE यांनी दि. 22 जुलै, 2019 रोजी पीएम-कुसुम योजनेसाठी मार्गदर्शक सुचना निर्गमित केल्या. तसेच 13 जानेवारी, 2021 रोजी 1 लाख सौर कृषिपंप व 30 ऑगस्ट, 2022 रोजी पुढील 1 लाख सौर कृषिपंप असे एकूण 2 लाख सौर कृषिपंप आस्थापित करण्यासाठी मान्यता दिली. राज्य शासनाकडून 12 मे, 2021 रोजी राज्यात सदर योजनेसाठी शासन निर्णय निर्गमित केला. या अंतर्गत दरवर्षी 1 लाख नग या प्रमाणे पुढील 5 वर्षांमध्ये 5 लक्ष सौर कृषिपंप आस्थापित करण्याचे उद्दिष्ट निश्चित केले. सदर योजनेअंतर्गत खुल्या प्रवर्गातील शेतकऱ्यांना 90 टक्के व अनुसूचित जाती व अनुसूचित जमाती प्रवर्गातील शेतकऱ्यांना 95 टक्के अनुदानावर सौर कृषिपंप उपलब्ध आहे.
पंप क्षमता पंपाची किंमत
3 HP 193803
5 HP 269746
7.5 HP 374402
लाभार्थी हिस्सा
सर्वसाधारण अनुसूचित जाती अनुसूचित जमाती
19380 9690 9690
26975 13488 13488
37440 18720 18720
सौर कृषिपंप आस्थापनेचे उद्दिष्ट, पीएम-कुसुम योजनेच्या शासन निर्णयातील नमूद तरतूद, जिल्ह्याच्या ग्रामीण लोकसंख्येनुसार व प्रथम येणाऱ्यास प्रथम प्राधान्य या तत्वावर पूर्ण करावयाचे आहे. महाऊर्जा मार्फत शेतकऱ्यांचे नवीन अर्ज स्विकरण्यासाठी 17 मे 2023 पासून कुसुम योजनेचे ऑनलाईन पोर्टल सुरू करण्यात आले आहे. महाऊर्जा मार्फत ऑनलाईन पोर्टल सुरु केल्यानंतर त्यास प्रचंड प्रतिसाद प्राप्त असून एकाच वेळी असंख्य शेतकरी अर्ज करण्याच्या प्रयत्नात असल्याने प्रक्रिया होण्यास विलंब होत आहे. तरी सर्व शेतकऱ्यांना योजनेचा लाभ घेता यावा म्हणून पोर्टलचा दररोज आढावा घेऊन जिल्हानिहाय कोटा वाढवून देण्यात येत आहे. तरी शेतकऱ्यांनी कोटा उपलब्ध नसल्यास, वाट पाहून कोटा उपलब्ध झाल्यावर अर्ज करावा.
महाऊर्जाच्या खालील संकेतस्थळावर भेट देऊन ऑनलाईन अर्ज करण्यात यावा.
योजनेची व ऑनलाईन अर्ज करण्याची सर्व माहिती महाऊर्जा www.mahaurja.com संकेतस्थळावर उपलब्ध आहे.
शेतकऱ्यांनी महाऊर्जाच्या संकेतस्थळावरुन अर्ज करावा व इतर कुठल्याही बनावट/फसव्या संकेतस्थळाचा वापर करु नये. आनॅलाईन पोर्टल सुरू केल्यापासून राज्यात एकूण 23 हजार 584 अर्ज प्राप्त झाले असून धुळे जिल्ह्यातून 1 हजार 133 अर्ज प्राप्त झाले आहेत.
महाऊर्जामार्फत सुरु केलेल्या ऑनलाईन पोर्टलचा लाभ सर्व शेतकऱ्यांनी घ्यावा. तसेच ऑनलाईन पोर्टलवर अर्ज करताना येणाऱ्या अडचणींसाठी 020-35000456 / 020-35000457 या दूरध्वनी क्रमांकावर आपण तक्रार नोंदवू शकता, असे रविंद्र जगताप, महासंचालक (महाऊर्जा) यांनी कळविले आहे.
