Kiran Ahirrso Accident चार मित्रांवर एकाचवेळी अंत्यसंस्कार करताना साऱ्यांचे डोळे पाणावले

शेवटचा सेल्फी पाहून सारेच हळहळले

अपघातात मृत झालेले किरण अहिरराव, प्रविण पाटील, अनिल पवार आणि कृष्णकांत माळी हे चौघेही जिवलग मित्र होते. किरण अहिरराव हे धुळ्यातील बालरोग तज्ज्ञ डॉ. महेश अहिरराव यांचे लहान बंधू होते. धुळे महापालिकेच्या गेल्या पंचवार्षिक निवडणुकीत ते भाजपच्या तिकीटावर प्रभाग क्रमांक सहामधून निवडून आले होते. तसेच त्यांच्या पत्नी भारती अहिरराव यादेखील यापुर्वी दोनवेळा धुळे जिल्हा परिषदेच्या सदस्या राहिल्या आहेत. किरण अहिरराव यांच्या पश्चात पत्नी, मुलगा, मुलगी, आई, भाऊ, बहिण, वहिनी असा परिवार आहे.  तसेच या अपघातात मृत कृष्णकांत माळी हे मोघण येथील ज्ञानज्योती विद्या प्रसारक संस्थेचे संस्थापक चिंधा माळी यांचे सुपूत्र होते. मोघणचे माजी उपसरपंच असलेले कृष्णकांत माळी हे सदर संस्थेत मुख्याध्यापक म्हणून कार्यरत होते. कृष्णकांत हे बाबा नावाने परिचित होते. कोरोना काळात त्यांच्या पत्नीचे निधन झाले होेते. त्यानंतर त्यांनी दोन महिन्यांपुर्वीच दुसरा विवाह केला होता. त्यांच्या पश्चात पत्नी, दोन मुले असा परिवार आहे. चौघेजण जिवलग मित्र होते आणि शेवटच्या श्वासापर्यंत सोबतच राहिले, अशी भावनिक चर्चा होती. अपघाताच्या आधी किरण अहिरराव यांनी घेतलेला शेवटचा सेल्फी चौघांच्या मृत्यूनंतर सोशल मीडियावर व्हायरल झाला आणि तो पाहून सारेच हळहळले…