कुळवाडीभूषण छत्रपती शिवाजी महाराज जयंतीनिमित्त आमदारांनी केले अभिवादन
धुळे : कुळवाडीभूषण छत्रपती शिवाजी महाराज यांची जयंती देशभरात मोठ्या उत्साहात साजरी केली जात आहे. धुळे शहरासह जिल्ह्यात देखील शिवजयंतीचा उत्साह मोठा आहे. रयतेचे राजे छत्रपती शिवाजी महाराज यांच्या पुतळ्याला पुष्पहार अर्पण करून आमदार फारुख शाह यांनी समस्त शिवप्रेमी जनतेला शुभेच्छा दिल्या.
एका बाजूला देशात सामान्य जनता महागाईने होरपळत आहे. बेरोजगारीने कळस गाठलेला आहे. तर दुसऱ्या बाजुला सत्ताधारी जनतेच्या प्रश्नांना बगल देवून धार्मिक उन्माद पसरविण्यात मश्गूल आहेत. अशा काळात छत्रपती शिवरायांचे रयतेचे हित जोपासण्याच्या विचारांचे महत्त्व अधोरेखित होते. आज शिवबा असते तर त्यांनी जनताद्रोही सत्ताधाऱ्यांचा रायगडावरून कडेलोट केला असता. त्यामुळे आजच्या काळात कुळवाडीभूषण छत्रपती शिवाजी महाराज यांचे विचार, त्यांचा राजकीय व्यवहार, अर्थानिती, शेती धोरण याची नितांत गरज असल्याचे प्रतिपादन आमदार फारुख शाह यांनी केले.
याप्रसंगी डॉ. दीपश्री नाईक, डॉ. बापुराव पवार, आसिफ शाह, निलेश काटे आदी उपस्थित होते.
