इंडिया आघाडीच्या उमेदवार डॉ. शोभा बच्छाव यांच्या प्रचारार्थ शरद पवार यांची सटाण्यात जाहीर सभा
धुळे : धुळे लोकसभा मतदारसंघातील काँग्रेस इंडिया आघाडीच्या उमेदवार डॉ. शोभा बच्छाव यांच्या प्रचारार्थ गुरुवारी नाशिक जिल्ह्यातील सटाणा येथे इंडिया आघाडीचे राष्ट्रीय नेते शरद पवार यांची जाहीर सभा झाली.
या सभेत ज्येष्ठ नेते शरद पवार, काँग्रेसचे अध्यक्ष बाळासाहेब थोरात, राष्ट्रवादी काँग्रेसचे अध्यक्ष जयंत पाटील, काँग्रेसच्या महिला नेत्या आणि ज्येष्ठ सामाजिक कार्यकर्त्या प्रतिभा शिंदे, उमेदवार डॉ. शोभा बच्छाव यांच्यासह स्टार प्रचारक नितेश कराळे आणि खासदार अमोल कोल्हे यांनी नरेंद्र मोदी आणि मोदी सरकारवर घणाघाती टीका केली. तसेच केंद्रात सत्ता स्थापन करण्यासाठी इंडिया आघाडीच्या उमेदवारांना विजयी करण्याचे आवाहन केले. (Watch Video)
शरद पवार म्हणाले, मोदींनी दिलेली आश्वासने पाळली नाहीत आणि सतत खोटं बोलत राहिले. शेतकऱ्यांना देशोधडीला लावले. बऱ्याच दिवसांतून आज मी या ठिकाणी आलो. एक काळ असा होता की, महाराष्ट्राच्या विधानसभेमध्ये काम करत असताना आम्हा लोकांबरोबर पंडित धर्मा पाटील हे एक ज्येष्ठ नेते या भागातील शेतकऱ्यांच्या प्रश्नांसाठी सातत्याने जागरूकपणाची भूमिका घेणारे सटाणा या भागातले होते, त्यांची आठवण मला होते. नंतरच्या काळात अनेक लोक येऊन गेले आणि त्यांनी तुम्हा लोकांचं प्रतिनिधित्व केलं. नाशिक जिल्ह्यामध्ये तुम्हा लोकांचा नावलौकिक फार मोठा आहे. त्याचे महत्त्वाचे कारण पाण्याचा प्रश्न असताना, दुष्काळाची स्थिती अनेक वेळेला तयार होत असताना, शक्य असेल त्या ठिकाणी थेंब अन् थेंब पाणी साठव, शेत तळे बांध, रिप रिप पाणी दे आणि उत्तम शेती कशी करता येईल, यासाठी प्रयत्नांची पराकष्टा तुमच्या पुढच्या पिढीने आणि आधीच्या पिढीने सातत्याने केली. त्यामुळे नाशिक काय, धुळे काय या भागाचा शेती उत्पादनाबद्दल एक नावलौकिक वाढला आणि त्याचे १०० टक्के श्रेय तुम्ही जी मेहनत केली, तुम्ही जे कष्ट करत आहात त्याला आपल्या सर्वांना द्यावे लागेल.
जयंत पाटील म्हणाले, शोभाताईंनी एक आदर्श कार्यकर्ता आणि नेत्या म्हणून काँग्रेसमध्ये गेली अनेक वर्ष कार्य केले. राज्याच्या आरोग्य राज्यमंत्री असताना नाशिक जिल्ह्यामध्ये मल्टी स्पेशलिटी हॉस्पिटल व्हावे यासाठी त्यांनी प्रयत्न केले आणि त्यामुळेच आरोग्यवस्थेचा एक आकार येथे निर्माण झाला. त्याचे श्रेय शोभाताईंना जाते.
आज धुळे मतदार संघाच्या महाविकास आघाडीच्या अधिकृत उमेदवार डॉ. शोभाताई बच्छाव यांच्या प्रचारार्थ बागलाण तालुक्यात राष्ट्रवादी (शरदचंद्र पवार पक्षाचे) प्रणेते शरद पवार यांची भव्य सभा पार पडली व त्यांचे विचार धुळे मतदार संघाच्या लोकांना ऐकायला मिळाले. शोभाताई यांना प्रचंड बहुमताने विजयी करण्याचे आवाहन त्यांनी केले.
यावेळी मान्यवर बापु चौरे, शिरीष कोतवाल, यशवंत गोसावी, महेबुब शेख, संजय चव्हाण, दिनेश अहिरे, दिपिकाजी चव्हाण, सक्षणा सलगर यांच्यासह मतदार, नागरीक, शेतकरी तसेच अन्य सर्व सहकारी आणि मविआ पदाधिकारी, कार्यकर्ते उपस्थित होते.
हेही वाचा
