The market of fake, uncertified drugs will be down!
बनावट, अप्रमाणित औषधांचे मार्केट होणार डाऊन!
राज्यात बनावट आणि अप्रमाणित औषधांबाबत अनिल परब यांनी सोमवारी (दि. २०) प्रश्न विचारला होता. त्यावर आम्ही तत्काळ निर्णय घेतला असून, कोणताही औषधाचा साठा परत बोलवायचा असल्यास किंवा त्याची माहिती प्राप्त करून घ्यायची असल्यास उत्पादक ते अंतिम ग्राहक यांची माहिती असणे गरजेचे आहे. त्यासाठी आम्ही लगेच पोर्टल तयार करण्याचा निर्णय घेतला आहे. – संजय राठोड, अन्न व औषध प्रशासन मंत्री
Nashik News नाशिक : बनावट आणि अप्रमाणित औषधांचे मार्केट लवकरच डाऊन होणार आहे.
राज्यातून किंवा परराज्यातून बाजारात येणाऱ्या बनावट व अप्रमाणित औषधांची विक्री तत्काळ थांबविण्यासाठी अन्न-औषध प्रशासनातर्फे पोर्टल तयार केले जात आहे. या पोर्टलला राज्यातील सर्व औषध उत्पादक व वितरकांना जोडले जाणार आहे. त्यामुळे बनावट व अप्रमाणित औषधांची विक्री थोपविता येणार आहे.
एखादे औषध बनावट अथवा अप्रमाणित घोषित झाल्यानंतर त्याचा वापर थांबविण्यासाठी व बाजारातून साठा परत घेण्यासाठी प्रशासनाकडून कार्यपद्धती तयार करण्यात आली आहे. या कार्यपद्धतीत औषधाचा वापर थांबवून उर्वरित साठा बाजारातून मागे बोलावता येतो. सद्य:स्थितीत औषध विक्रीसाठी उत्पादकाने उत्पादित केलेली औषधे विक्री करण्यास कोणतीही भौगोलिक मर्यादा नाही. त्यामुळे राज्यातील व राज्याबाहेरील उत्पादकांची विविध प्रकारची औषधे राज्याच्या व देशाच्या बाजारात विक्रीस उपलब्ध असतात. अशी उत्पादने महाराष्ट्रातील व देशातील कानाकोपऱ्यात पोहचलेली असतात. जेव्हा रुग्णास एखाद्या औषधाच्या सेवनाने त्रास झाला किंवा मृत्यू झाला, तर अशा प्रसंगी संबंधित औषधाचा वापर तत्काळ थांबवून त्याचा बाजारातील साठा परत घेणे आवश्यक ठरते. या परिस्थितीत प्रशासनाकडे असलेले मनुष्यबळ आणि कामाची व्याप्ती पाहता आणीबाणीच्या प्रसंगी प्रभावी कामकाज करण्यावर मर्यादा येतात. यासाठी तंत्रज्ञानाची मदत घेतल्यास चांगल्या पद्धतीने नियोजन होऊन रुग्णास व जनतेस दिलासा देणे शक्य होईल.
सध्या अस्तित्वात असलेल्या कार्यपद्धतीत अप्रमाणित औषधांचा चाचणी अहवाल प्राप्त झाल्यानंतर औषधांचा वापर थांबविण्याची कार्यवाही करण्यासाठी वितरण साखळीमध्ये प्रभावी संवाद न घडल्यामुळे बाजारातून साठा परत घेताना महत्त्वाचा कालावधी वाया जातो. पर्यायाने नेमून दिलेल्या कालमर्यादेत औषधे परत येत नाहीत. यात जास्त मनुष्यहानी होण्याचा धोका संभवतो. ती टाळण्यासाठी औषधांच्या वापर व वितरण व्यवस्थेतील उत्पादक, सुपर स्टॉकिस्ट, होलसेलर्स, वितरक, केमिस्ट अशा घटकांपर्यंत माहिती पोहचविणे आवश्यक आहे. यासाठी सॉफ्टवेअरची गरज असून, जेणेकरून बनावट अप्रमाणित औषधे अथवा एखाद्या औषधाचा वापर तत्काळ थांबविण्यासाठी या संगणक प्रणालीचा वापर प्रभावी ठरेल.
