शेतकऱ्याचे 50 हजार चोरणाऱ्या त्या दोन चोरांना पकडले
धुळे : येथील कृषी उत्पन्न बाजार समितीच्या आवारात एका शेतकऱ्याच्या खिशातून 50 हजारांची रोकड चोरून पसार झालेल्या त्या दोन चोरांना पकडण्यात आझादनगर पोलिसांना यश आले.
रफीक समद शेख (वय 20, रा. सुरत) आणि सईद खान नजीर खान पठाण ऊर्फ चुव्हा (रा. ख्वाजानगर, सुरत ह. मु. वाल्मीकनगर, हुडको, शिरपूर) अशी त्यांची नावे आहेत. त्यांना सोमवारी सुरत येथून ताब्यात घेतल्याचे पोलिसांनी सांगितले. दोघा आरोपींविरूध्द गुजरात राज्यात चोरी व खुनासारखे गंभीर स्वरुपाचे गुन्हे दाखल आहेत.
धुळे कृषी उत्पन्न बाजार समितीत बाजाराच्या दिवशी गर्दीचा गैरफायदा घेत त्यांनी ही चोरी केली होती. जळगाव जिल्ह्यातील हिवरखेडा येथील रहिवासी अर्जुन भिका जोगी (वय 41) यांनी मुलीच्या लग्नासाठी 5 डिसेंबरला म्हैस विक्री केली. 65 हजारांपैकी एका खिशात 50 हजार आणि दुसऱ्या खिशात 15 हजार रुपये ठेऊन ते गुरांच्या बाजारातून बाहेर पडले. त्यावेळी एकाने त्यांना दुचाकीने धडक दिली आणि या गडबडीत दुसऱ्याने त्यांच्या खिशातून 50 हजार रुपये चोरले. ही घटना सीसीटीव्ही कॅमेरात कैद झाली होती. अर्जुन जोगी यांनी स्वतः सीसीटीव्ही फुटेज पोलिसांना उपलब्ध करून दिले होते. त्यानुसार गुन्हा दाखल झाला.
सीसीटीव्ही फुटेजमधील अनोळखी इसमांच्या शरीरयष्टीबाबत आझादनगरचे पोलीस निरीक्षक नितीन देशुख यांना मिळालेल्या गोपनिय माहितीच्या आधारे शोध पथकाने गुजरात राज्यातील सुरत येथुन रफीक समद शेख (वय 20) याला ताब्यात घेतले.
चौकशीत त्याने हा गुन्हा सईद खान नजीर खान पठाण याच्यासह केल्याची कबुली दिली. त्यानुसार पथकाने सईद खान याला देखील शिरपुरातून ताब्यात घेतले.
दोघांकडून गुन्ह्यात चोरीस गेलेल्या रक्कमेपैकी 30 हजारांची रोकड व गुन्हयात वापरलेली 70 हजारांची दुचाकी (क्र. एम. एच. 18 बी. डब्ल्यू. 2614) असा एकूण एक लाखाचा मुद्देमाल हस्तगत करण्यात आला. पुढील तपास पोलीस नाईक सी. पी. पाटील करीत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक किशोर काळे, उपविभागीय पोलीस अधिकारी सचिन हिरे यांच्या मार्गदर्शनाखाली पोलीस निरीक्षक नितीन देशमुख, सहायक पोलीस निरीक्षक संदीप पाटील, योगेश शिरसाठ, मुक्तार मन्सुरी, शांतीलाल सोनवणे, संदीप कढरे, गौतम सपकाळ, चंद्रकांत पाटील, पंकज जोंधळे, सचिन जगताप, सिध्दार्थ मोरे, अजहर शेख, धिरज काटकर, संतोष घुगे यांच्या पथकाने केली आहे.
हेही वाचा
