जागतिक टपाल दिनानिमित्त राष्ट्रीय टपाल सप्ताह
धुळे : येत्या 9 ऑक्टोबर रोजी जागतिक टपाल दिन आहे. यानिमित्त धुळे डाक विभागातर्फे 9 ते 13 ऑक्टोबर या कालावधीत राष्ट्रीय टपाल सप्ताहाचे आयोजन करण्यात आले आहे, अशी माहिती धुळे डाक कार्यालयाचे अधीक्षक प्रताप सोनवणे यांनी दिली.
सोमवार 9 ऑक्टोबर रोजी जागतिक टपाल दिनी सर्व प्रशासकीय व टपाल कार्यालयांमध्ये स्वच्छता मोहीम राबविण्यात येईल. कार्यालये नीटनेटकी आणि स्वच्छ दिसण्यासाठी जुने होर्डिंग, कालबाह्य सूचना काढण्यात येणार आहेत. तसेच 10 ऑक्टोबर रोजी वित्तीय सक्षमीकरण दिवस साजरा केला जाईल. यात डाक समुदाय विकास कार्यक्रम अंतर्गत भारतीय डाक विभागाच्या विविध बचत योजनांची माहिती देण्यासाठी व खाते उघडण्यासाठी धुळे विभाग अंतर्गत विशेष मेळाव्याचे आयोजन करण्यात येणार असून त्यासाठी केंद्र, राज्य आणि स्थानिक लोकप्रतिनिधी, नागरिकांचा सहभाग घेण्यात येणार आहे. तसेच 11 रोजी फिलाटेली दिवस साजरा होईल. यात धुळे प्रधान डाकघर येथे शालेय मुलांचा सहभाग घेऊन फिलाटेली सेमिनार व प्रश्नमंजुषा कार्यक्रम आयोजित करण्यात येईल. यादरम्यान त्यांना तिकीटांचा संग्रह करण्याचा निबंध स्पर्धा याविषयी विस्तृत माहिती देण्यात येईल. 12 ऑक्टोबर रोजी मेल आणि पारस दिवस साजरा केला जाईल. या दिवशी सर्व पोस्ट मास्तर व वितरण कर्मचारी यांच्यासाठी धुळे कार्यालयाकडून कार्यशाळेचे आयोजन करण्यात येईल. टपाल विभागातील वितरण प्रणालीविषयी माहिती देऊन त्यांचा अभिप्राय घेण्यात येईल. 13 ऑक्टोबर रोजी अंत्योंदय दिवस साजरा केला जाईल. या दिवशी ग्रामीण दुर्गम भागात आणि शहरी झोपडपट्टी वस्त्यांमधून जनजागृती, आधार नोंदणी शिबिराचे आयोजन केले जाणार आहे. तसेच ग्राहकांच्या लाभासाठी सामाजिक सुरक्षा, पेन्शन, जन सुरक्षा योजना, सुकन्या समृद्धी खाती, महिला सन्मान बचत प्रमाणपत्र आणि पोस्ट विभागाची इतर उत्पादने सेवा यांच्या बद्दल माहिती दिली जाईल.
या कार्यक्रमांचा धुळे जिल्ह्यातील नागरिकांनी लाभ घ्यावा, असे आव्हान धुळे विभागाचे प्रवर अधीक्षक सोनवणे यांनी केले आहे.
