मराठा समाजाचे शोषण मराठा मुख्यमंत्र्यांनीच केले! भाजपचा आरोप
धुळे : मराठा समाजाला आरक्षण देण्यास आमचा विरोध नाही. पण ते ओबीसी कोट्यातून दिले जाऊ नये, अशी आमची भूमिका आहे. मराठा समाजाचे शोषण आजवर झालेल्या मराठा मुख्यमंत्र्यांनीच केले, असा आरोप भाजपचे महामंत्री विजय चौधरी यांनी रविवारी धुळ्यात केला. मराठा आरक्षणासाठी उपमुख्यमंत्री देवेंद्र फडणवीस यांनी जे काम केले आहे ते आजपर्यंत कुणीही केले नाही, असेही त्यांनी स्पष्ट केले.
खानदेश तेली समाज मंडळाच्या वतीने खानदेशातील शेकडो शिक्षकांचा गुरु गौरव सोहळा नुकताच छत्रपती शाहू महाराज नाट्य मंदिर येथे झाला. या कार्यक्रमाला विजय चौधरी प्रमुख पाहुणे म्हणून उपस्थित होते. कार्यक्रमाच्या सुरुवातीला संताजी महाराज यांच्या प्रतिमेला पुष्पहार अर्पण करून दीप प्रज्वलन करत सुरुवात करण्यात आली. यात धुळे नंदुरबार, जळगाव ,नाशिक या यासह विविध भागातील शिक्षकांचा मान्यवरांच्या हस्ते सपत्नीक प्रमाणपत्र देऊन सत्कार करण्यात आला. त्यानंतर उपस्थित मान्यवरांनी शिक्षकांसह समाज बांधवांना सखोल मार्गदर्शन केले.
याप्रसंगी भाजपाचे प्रदेश सचिव विजय चौधरी, राष्ट्रवादीचे सरचिटणीस इर्शाद जहागीदार, महापौर प्रतिभा चौधरी, विरोधी पक्षनेत्या कल्पना महाले, माजी महापौर जयश्री अहिरराव, शिवसेना जिल्हाप्रमुख सतिष महाले, कमलाकर आहिरराव, नगरसेविका पुष्पा बोरसे, पोलीस उपनिरीक्षक लक्ष्मी करनकाळ, खानदेश तेली समाज मंडळाचे अध्यक्ष कैलास चौधरी, सचिव रवींद्र चौधरी, कार्याध्यक्ष मनोज चिलंदे यांच्यासह समाज बांधव मोठ्या संख्येने उपस्थित होते.
हेही वाचा
