हंसराज रघुवंशींच्या भजनसंध्येत अवघे धुळेकर झाले चिंब

धुळे : भारतीय जनता पक्षाचे ज्येष्ठ नेते, उद्योग, समाजकारण, अर्थकारण, शिक्षण, सहकार आदी क्षेत्रांतील बहुआयामी व्यक्तिमत्त्व ओमप्रकाश अग्रवाल यांच्या अमृतमहोत्सवी वाढदिवसानिमित्त रविवारी (ता. ४) सायंकाळी प्रसिद्ध गायक हंसराज रघुवंशी यांच्या सुमधुर आवाजातील भक्तिरसात अवघे धुळेकर चिंब झाले. येथील खान्देश गोशाळेच्या मैदानावर रात्री उत्तरोत्तर रंगत गेलेला या सोहळ्यात उपस्थित धुळेकरांसह अग्रवाल कुटुंबीयांनी धार्मिक भक्तिगीतांवर ताल धरला.

आमदार अनुपभैया अग्रवाल यांच्या संकल्पनेतून झालेल्या या सोहळ्यात अग्रवाल कुटुंबाने दुष्काळी स्थितीचे समाजभान राखत शेतकऱ्यांप्रती आपली संवेदनशीलता दाखवून देत ११ शेतकऱ्यांना वासरांसह दुभत्या गायींचे मान्यवरांच्या हस्ते दान केले. तसेच शेतकरी दाम्पत्यांचा साडी-चोळीचा आहेर देत सन्मान केला. यानंतर प्रत्येकाला प्रतीक्षा असलेल्या हंसराज रघुवंशी यांच्या भजनसंध्येला प्रारंभ झाला.

विविध गीतांतून महादेवाला साकडे : प्रसिद्ध गायक हंसराज रघुवंशी यांनी त्यांच्या सुमधुर आवाजात भगवान महादेव, श्रीराम, श्रीकृष्ण आदी देवतांच्या स्तुतीपर गीतांतून धुळे जिल्ह्यावर दुष्काळाचे ओढवलेले संकट दूर करण्याचे आवाहन केले. गायक हंसराज यांनी गायलेल्या गीतांमुळे संपूर्ण मैदानावरील धुळेकर त्यांना साथसंगत करताना प्रत्येक गीतावर टाळ्यांचा कडकडाट तर करतच होते. शिवाय प्रत्येक गीतावर नृत्याचा तालही धरत होते. या भक्तिमय वातावरणात अनेक मान्यवर आपले वय, हुद्दा विसरून देहभान हरपून नृत्यात दंग झाले होते.

अग्रवाल कुटुंबीयांनीही धरला ताल : गायक हंसराज यांनी केलेल्या आवाहनानुसार प्रारंभी आमदार अनुपभैया अग्रवाल, अल्पा अग्रवाल आणि चिरायू अग्रवाल यांनी व्यासपीठावर गायक हंसराज यांच्यासोबत गायनात साथसंगत केली. तसेच भक्तिपूर्ण गीतांवर नृत्यही केले. यानंतर व्यासपीठाखाली अनेक धुळेकरांसबोतच ओमप्रकाश अग्रवाल यांच्यासह अग्रवाल कुटुंबातील प्रत्येक सदस्याने गायक हंसराज यांच्या आवाहनाला प्रतिसाद देत हात उंचावत नृत्याचा ताल धरला. सुमारे दोन तास चाललेल्या या भक्तिमय कार्यक्रमाने अवघे धुळेकर भारावून गेले. उपस्थितांकडून होणाऱ्या विनंतीसह मागणीनुसार गायक हंसराज रघुवंशी यांच्यासह साधो बँड पथकाने अनेक भक्तिगीते सादर करत धुळेकरांची मने जिंकली.