अहमदनगर: कलाकेंद्रात संगीतबारी सादर करण्यासाठी नर्तिका देण्याच्या बहाण्याने सूरज भूषणराव आंबेकर यांना राशीनजवळ निर्जन ठिकाणी नेऊन लुटण्याचा प्रकार घडला आहे. या प्रकरणी कर्जत पोलिसांना तातडीने तपास करुन दोन आरोपींना अटक केली आहे. गुन्हेगारी क्षेत्राच्या भाषेत ‘ड्रॉप’ म्हणून ओळखल्या जाणाऱ्या घटनांमध्ये आता एका नव्या बहाण्याची भर पडली आहे. नगर जिल्ह्याच्या काही भागात स्वस्तात सोने देण्याच्या आमिषाने धनिकांना निर्जन ठिकाणी नेऊन लुटण्याच्या घटना घडत आहेत. आता अशाच प्रकारची घटना मराठवाड्यातील एका कलाकेंद्र चालकाच्या बाबतीत घडला आहे.
उस्मानाबादच्या कलाकेंद्रावर संगीत पार्टीत नृत्य करण्यासाठी आम्ही तुमच्याकडे येतो असा खोटा बहाणा करुन आणि संबंधित पार्टीला आपल्याकडे बोलावून त्यांच्याकडून उचल घेऊन आणि चाकूचा धाक दाखवून रात्रीच्या अंधारात मारहाण करून जबरदस्तीने रोख रक्कम, सोने, मोबाईलवर डल्ला मारणाऱ्या दोघांना कर्जत पोलिसांनी जेरबंद केले आहे.
सूरज भूषणराव आंबेकर (रा.लातूर हल्ली आळणी ता.जि.उस्मानाबाद) यांचा संगीत पार्टीचा व्यवसाय असून ते आळणीफाटा येथे पिंजरा सांस्कृतिक कला केंद्र येथे पार्टी चालवतात. त्यांच्या पार्टीत एक नर्तिका कामाला असून तिचे सोशल मीडियावर वेगवेगळे अकाउंट आहेत. इन्स्टाग्रामवर नृत्याचे विविध व्हिडीओ अपलोड करत असल्याने तिचे अनेक फॉलोवर्स आहेत.
आरती भोसले या अकाउंटवरून तिची ओळख झाली होती. अधूनमधून फोनवर बोलणे होत होते. मागील दहा दिवसांपासून आरती भोसले (रा.राशीन) ही ‘मला तुमच्या पार्टीत काम करायचे आहे’ असे म्हणत होती. आंबेकर यांना पार्टीत नर्तिकांची गरज होती. त्यामुळे उचल देऊन तिला पार्टीत घेण्याचे ठरले. २० जानेवारी रोजी ७० हजार घेऊन या ते घरी द्या आणि दोन मुली आहेत आणि त्यांना प्रत्येकी ४० हजार घेऊन या’, असे आरती भोसलेने सांगितले. त्यानंतर आंबेकर आणि अन्य चार जण राशीन येथे घरी न बोलवता करमाळा रोडवर बोलवले. रोख ७० हजार दिले. अन्य दोन मुली पुढे राहतात असा बहाणा करून गाडी अज्ञातस्थळी आणल्यावर दोन अनोळखी मुली आणि अनोळखी व्यक्ती गाडीच्या दिशेने चालत आले. मुलींना देण्यासाठी रोख रक्कम नसल्याने एटीएममधून पैसे काढतो असे आंबेकर यांनी सांगितले.
गाडीत बसताच लपून बसलेल्या सात ते आठ जणांनी आंबेकर यांना पाठीमागून पकडले आणि खाली पाडले. त्यांच्या गळ्यातील सोन्याची चैन काढून घेऊन खिशातील पाकीट, हातातील अंगठी काढून घेतली. त्यानंतर एकाने चाकूचा धाक दाखवून चालकाकडून मोबाईल व पाकीट बळजबरीने घेतले. गाडीत बसलेल्या महिलेच्या गळ्यातील मंगळसूत्र हिसकावून घेतले. सोबत आलेल्या सचिन कापसे यांना मारहाण करून त्यांच्या हातातील अंगठी व खिशातील पाकीट काढून घेऊन त्यांना कॅनॉलमध्ये ढकलून दिले. वाहनात बसलेल्या सहचालकाचा मोबाईल काढून घेतला. सोबत असलेली नर्तिकेला मारहाण करून मोबाईल काढून घेतला. या गुन्ह्यात एकूण १ लाख २७ हजारांचा मुद्देमाल त्यांनी चोरून नेला असल्याची कर्जत पोलिसात फिर्याद देण्यात आली आहे. दरोड्याचा गुन्हा दाखल करण्यात आला आहे.
या घटनेचे गांभीर्य ओळखून कर्जत पोलिसांनी तात्काळ घटनास्थळी धाव घेतली. उपविभागीय पोलीस अधिकारी आणि अप्पर पोलीस अधीक्षक यांनी घटनास्थळी भेट दिली. शोध घेऊन दोन आरोपींना अटक करण्यात आली असून चार दिवस पोलीस कोठडी सुनावण्यात आली आहे.
जिल्हा पोलीस अधीक्षक राकेश ओला, अपर पोलीस अधीक्षक प्रशांत खैरे उपविभागीय पोलीस अधिकारी अण्णासाहेब जाधव यांच्या मार्गदर्शनाखाली पोलीस निरीक्षक चंद्रशेखर यादव, सहाय्यक पोलीस निरीक्षक सतीश गावित, पोलीस अमंलदार मारुती काळे, भाऊ काळे, अर्जुन पोकळे, श्याम जाधव, संपत शिंदे, महादेव कोहक, मनोज लातूरकर, गणेश भागडे, संभाजी वाबळे, नितीन नरुटे यांनी ही कामगिरी केली.
